CHADEMA yamuweka kitimoto Ofisa Mtendaji

WAKATI kampeni za uchaguzi mdogo wa udiwani zikiwa zimeanza rasmi jana, Chama cha Demokrasia na Maendeleo (CHADEMA), kimemuweka chini ya ulinzi Ofisa Mtendaji wa Kata ya Nyasura, Wilaya ya Bunda mkoani Mara, John Yapanda, baada ya kiongozi huyo kumnyang’anya kadi ya kupigia kura mgombea wa udiwani kata hiyo, Julius Wassira (CHADEMA).

Ofisa Mtendaji huyo wa kata alifika kwenye mkutano wa uzinduzi wa kampeni wa CHADEMA katika kata hiyo, kisha kumwamuru Wassira amkabidhi kitambulisho chake cha kupigia kura, kwa madai amewekewa pingamizi na mmoja wa wagombea wa vyama vingine.

Baada ya Wassira kumpa kadi yake hiyo, Yapanda alitaka kuondoka nayo, jambo lililosababisha baadhi ya viongozi, wapenzi na makada wa chama hicho kuchachamaa na kumkamata mtendaji huyo.

Baada ya Ofisa Mtendaji huyo kukamatwa, umati mkubwa wa wananchi uliokuwa umehudhuria mkutano huo wa uzinduzi wa kampeni, nao walichachamaa wakitaka kuanza kumsulubu, lakini busara za viongozi wa CHADEMA zilitumika kwa kutuliza munkari wao.

Hata hivyo, baadaye mtendaji Yapanda alipandishwa jukwaani na kuamuriwa aeleze sababu za kumnyang’anya mgombea wao kadi ya kupigia kura, ambapo alisema: “Jamani sina nia mbaya mimi, kuna pingamizi amewekewa kwa kutumia jina la Wassira eti siyo lake.”

Akihutubia mkutano huo, Mbunge wa Musoma Mjini, Vincent Nyerere, alisema Serikali ya CCM imeshindwa kuwasaidia wananchi kuondokana na umaskini.

Alisema CCM na viongozi wake wamewatelekeza wananchi na kushindwa kuwapatia huduma bora za kibinadamu kama vile maji, afya, barabara na elimu bora, hivyo aliwaomba kumchagua mgombea wa CHADEMA, Wassira kuwa diwani wao ili awatumikie kwa kuwapatia maendeleo

Chanzo;Tanzania Daima