VYANZO KUSHUKA ZAO LA PAMBA VYATAJWA

na Berensi Alikadi, Bunda

UKOSEFU wa mitaji kwa wakulima, usimamizi imara wa watalamu na utashi wa kisiasa vimekuwa vikichangia kushuka kwa uzalishaji wa zao la pamba wilayani Bunda kila mwaka.

Hayo yalibainishwa mwishoni mwa wiki na washiriki wa mkutano wa kuboresha kilimo cha pamba katika wilaya hiyo chini ya uenyekiti wa Mkuu wa wilaya hiyo, Joshua Mirumbe.

Wakichangia mada katika mkutano huo, baadhi ya wadau na wakulima wa zao hilo walidai wakulima wengi hawana mitaji ya kuendeleza zao hilo na kwamba wengi wao wakishauza pamba hutumia pesa zote na hata kukosa ya kununua pembejeo kwa msimu ujao.

Mkaguzi wa Bodi ya Pamba wilaya za Bunda na Serengeti, Igoro Maronga, alisema suala la kilimo cha pamba sasa hivi kimekosa usimamizi kuanzia kwa maofisa ugani hadi kwa wanasiasa ambao pia wamekuwa hawalitilii maanani sana licha ya kufahamu kuwa ndilo zao pekee linalowapa tija wapiga kura wao.

Igoro alibainisha ukiukwaji wa masharti ya kanuni kumi za kilimo cha zao hilo, mbegu kutochanganywa vizuri viwandani na kutoweka mbolea za samadi mashambani kimekuwa chanzo kikubwa cha wakulima kupata mazao hafifu.

Naye Ofisa Kilimo wa Kata ya Hunyari, Daudi Iramba, alisema kumekuwepo na tabia ya baadhi ya makampuni kuunda vikundi vya wakulima vijijini bila kuwahusisha wataalamu, jambo ambalo limekuwa likiwapa shida maofisa ugani walioko vijijini katika kufanya kazi na vikundi hivyo.

Akifungua mkutano huo, Mkuu wa wilaya hiyo, Mirumbe, alisema lengo la mkutano huo ni kuweka mkakati wa pamoja wa kuboresha zao la pamba ambalo ndilo zao la biashara kwa wilaya hiyo ambapo hivi sasa uzalishaji wake unashuka kila mwaka.

Chanzo: Taaanzania Daima