NORTH MARA YAPONGEZWA KWA KUTUNZA MAZINGIRA

na Mwandishi wetu, Tarime

SERIKALI imeupongeza mgodi wa dhahabu wa North Mara unaomilikiwa na kampuni ya African Barrick Gold (ABG) kwa juhudi zake za kutunza mazingira.

Naibu Waziri wa Nchi Ofisi ya Makamu wa Rais (Mazingira), Charles Kitwanga, alitoa pongezi hizo mwishoni mwa wiki alipofanya ziara kwenye mgodi huo ulioko wilaya ya Tarime, Mara.

Katika ziara hiyo Kitwanga aliongozana na Naibu Waziri wa Nishati na Madini, Stephen Masele, ambapo uongozi wa mgodi ulieleza hatua mbalimbali unazochukua kuhakikisha kunakua na mazingira salama.

“Hali ya uhifadhi wa mazingira ni nzuri…wanapofanya uchimbaji wanahakikisha lile vumbi halitoki popote wanapochimba na kumwaga maji kupunguza nguvu ya vumbi.

“Kwa kweli wanajitahidi lakini kuna mambo kidogo inabidi tukubaliane ili kuhakikisha wanakidhi viwango vya dunia hasa ISO 14001,” alisema Kitwanga alipozungumza na waandishi wa habari.

Hata hivyo imegundulika kuwa baadhi ya maeneo ya Tarime yameathirika na uchafuzi wa mazingira unaotokana na matumizi ya kemikali ya zebaki inayotumiwa na wachimbaji wadogo.

Uongozi wa mgodi ulimweleza waziri huyo kuwa hautumii zebaki kwenye uzalishaji wake badala yake hutumia kemikali ya cyanide.

“Kwa kweli hili la wachimbaji wadogo nakubali kuwa wanahusika kwa sehemu katika uharibifu wa mazingira. Cha kwanza ni kuwajengea mazingira ambayo yatawafanya watumie hiyo zebaki lakini isitiririke katika vyanzo vya maji au mito yetu.

“Hilo tumelizungumza na maofisa madini wa kanda na mikoa hii ili tuhakikishe wanatumia mfuko wa wachimbaji wadogo ili wafanye shughuli zao kwa usalama,” alisema naibu waziri huyo.

Kitwanga alifanya ziara katika mgodi wa North Mara baada ya kuahidi kufanya hivyo kwenye kikao cha Bunge kilichopita.

Katika ziara hiyo, mawaziri hao walitembelea visima, shule na hospitali ya Sungusungu iliyofanyiwa ukarabati na mgodi huo kwa gharama ya zaidi ya sh milioni 500.

Chanzo: Tanzania Daima