Matukio ya wizi wa mifugo yakithiri

WANANCHI katika Wilaya Tarime mkoani Mara, wameiomba serikali kukomesha wizi wa mifugo unaotokea mara kwa mara wilayani humo, ambao unadaiwa kufanywa na watu kutoka nchi jirani.

Wakizungumza na waandishi wa habari wananchi hao waliokuwa wanafuatilia ng’ombe 10, walioibwa juzi, walidai kuwa wezi hao wanatoka nchi jirani ya Kenya ambapo waliibwa katika Kijiji cha Murito, kilichoko wilayani humo.

Walisema kuwa tabia ya wizi wa mifugo imekuwa ikijitokeza mara kwa mara huku wezi hao wakiwapeleka nchini humo, hivyo waliiomba serikali kuhakikisha wanaweka ulinzi madhubuti ili kukomesha matukio hayo kwani katika kipindi cha miaka miwili zaidi ya ng’ombe 800 wameibwa.

“Wezi hao baadhi yao wanatoka nchi jirani, tena wengine wana makazi ya sehemu mbili; hapa nchini na Kenya, tunaomba serikali itusaidie kukomesha hali hii,” alisema.

Akithibitisha kutokea kwa tukio hilo, Kamanda wa Polisi wa Kanda Maalumu ya Tarime na Rorya, Justus Kamugisha, alisema kuwa juhudi zinafanyika kukomesha tabia hiyo ikiwa ni pamoja na kufanya mawasiliano na askari wa Kenya ili kuhakikisha wezi hao wanakamatwa.

Chanzo;Tanzania Daima