Kikosi cha Dar chamsaka muuaji wa watu 10 Tarime

Kikosi Maalumu cha Polisi kilichotumwa kutoka Dar es Salaam kwa ajili ya kuongeza nguvu katika msako wa mtu aliyehusika na mauaji ya watu 10 katika vijiji kadhaa wilayani Tarime, kimewasili na kumeanza kumsaka mtuhumiwa.

Taarifa ya polisi iliyotiwa saini na Mkuu wa Operesheni jeshi hilo, Paul Chagonja, ilisema juhudi za kumsaka muuaji huyo zinaendelea.

“Tumejipanga na tayari timu maalumu ya kuongeza nguvu katika msako dhidi ya muuaji huyo imeshawasili Tarime,” alisema Chagonja na kuwataka wakazi wa wilaya hiyo kutoa ushirikiano kwa timu hiyo.

Mwandishi wa habari hii, alishuhudia ulinzi ukiwa umeimarishwa katika Mkoa wa Mara. Kazi hiyo inafanywa kwa ushirikiano wa polisi wa Mkoa wa Kipolisi wa Tarime/Rorya na Kikosi Maalumu kutoka Makao Makuu ya Jeshi la Polisi, jijini Dar es Salaam.

Mauaji hayo ya kikatili, yamezua hofu kubwa miongoni mwa wakazi wa vijiji vya wilaya hiyo na jana jioni ni watu wachache tu walionekana wakiwa mitaani .

Polisi wenye mbwa na magari, wamekuwa wakifanya ulinzi wa doria katika maeneo mbalimbali ya wilaya hiyo kwa lengo la kumnasa muuaji.

Kamanda wa Polisi wa Mkoa wa Kipolisi wa Tarime/ Rorya, Justus Kamugisha, alisema polisi wamejipanga vilivyo kumkabili mtu huyo.

“Msako mkali unaendelea tunashirikiana na polisi Mkoa wa Mara, huwezi kusema kuna usalama Tarime wakati jambazi bado hajakamatwa,” alisema.

Mkuu wa Wilaya ya Tarime, John Henjewele, alisema ulinzi umeongezwa katika Kata za Turwa, Kitare, Binagi ambako matukio ya mauaji yametokea.

Aliwataka wananchi kutoa taarifa wanapopata taarifa za mtu wasiyemjua au kumtilia shaka.

Henjewele alisema Serikali inazidi kuongeza nguvu za ulinzi ili kuhakikisha kuwa mtuhumiwa anakamatwa na kufikishwa mbele ya sheria.

“Huwa anavaa kofia ya sweta kichwani na moja anaitumia kukusanyia pesa. Baadhi watu aliowaua kwenye Grosary, kulitokana na kukataa kwao kutoa pesa alizokuwa anahitaji,” alisema Henjewele.

Alisema jana, Mkuu wa Mkoa wa Mara, John Tuppa alizitembelea familia za wafiwa na kuzipa pole.

Januari 26, mwaka huu katika Kijiji cha Mogabiri mtu anayedhaniwa kuwa ni jambazi aliwaua kwa risasi Zakaria Mwita Marwa (28) na Erick Maranya (24) baada ya kukutana nao njiani.

Usiku wa siku hiyo katika kijiji hicho hicho, muuaji huyo alimuua, Robert Kisiri (45) baada ya kuvamia Grocery inayomilikiwa na Chacha Ryoba na kumjeruhi mtu mwingine mmoja.

Januari 27, muuaji huyo alirudi tena katika kijiji hicho na kumuua kwa risasi, David Mwasi kabla ya kumjeruhi Machungu Nyamahemba (19) ambaye bado amelazwa katika Hospitali ya Tarime.

Siku hiyohiyo, alimuua pia kwa kumpiga risasi Juma Nyaitara wakati usiku wa kuamkia Januari 28, aliwaua watu wengine watatu ambao bado majina yao hayajafahamika. Mtu mmoja alipigwa risasi wakati akiendesha pikipiki katika Kijiji cha Nkende.

Mauaji hayo yametajwa kuwa ni ya aina yake kufanywa na mtu mmoja ambaye hata hivyo uwezo waka katika kutumia silaha haujafahamika.

Chanzo;Mwananchi