Waishio na VVU Bunda walalamikia unyanyapaa

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

BAADHI ya wanawake waishio na Virusi vya Ukimwi, Kata ya Sazira, Wilaya ya Bunda, mkoani Mara (WAVIU), wamesema bado wanakabiliwa na unyanyapaa kutoka kwa waume zao.

Wanawake hao waliyasema hayo hivi karibuni kwenye warsha ya siku mbili iliyofanyika kwenye kata hiyo kwa ufadhili wa shirika lisilo la kiserikali la The Foundation for Civil Society.
Warsha hiyo ililenga kuwawezesha wanawake hao kuifahamu Sheria ya Ukimwi ya mwaka 2008.
"Tunapokwenda kupima afya zetu hospitali au kwenye Vituo vya Afya, vipimo vikionesha kama tumepata maambukizi, licha ya wanaume kukataa kipima afya zao wanatutelekeza na kutuacha bila matunzo.
"Tabia hii ya kukosa matunzo mazuri, husababisha maambukizi kutoka kwa mama kwenda kwa mtoto hasa kwa wanawake wajawazito au wanaonyonyesha," walisema.
Waliongeza kuwa, kitendo cha wanaume wengi kutopima afya zao wilayani humo, kinachangia ongezeko la maambukizi mapya kwa wanawake wengine hivyo wametoa wito kwa wanaume kuona umuhimu wa kubadili tabia zao kwa kupima afya.
Akifungua warsha hiyo mgeni rasmi Ofisa wa Maendeleo ya Jamii, wilayani humo, Bi. Chausiku Mshola, alisema uelewa wa sheria ya Ukimwi ya mwaka 2008, utawasaidia wanawake hao kuzuia maambukizi mapya.
Alisema sheria hiyo pia itasaidia kupunguza unyanyapaa kwani itawasaidia wanawake hao kuelewa nini cha kufanya pale wanaponyanyapaliwa na waume zao au katika jamii.
Mwezeshaji wa warsha, Bi. Mariamu Mbaraka, alisema mara nyingi wanawake wanatuhumiwa na waume zao kuwa ndio chanzo cha maambukizi katika ndoa bila kutambua kuwa, wanawake ndio wanaofanyiwa ukatili mkubwa kingono.
"Wanaume wamekuwa wakiwabaka wanawake na kutowapa matunzo jambo ambalo linachangia wanawake kupata maambukizi kirahisi, hivyo uelewa wa sheria utawasaidia kujua hatua za kuchukua ili kujikinga na mambo hayo," alisema.

Chanzo;Majira