MUHONGO KUUNDA KAMATI KUTATHMINI KERO ACACIA.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

WAZIRI wa Nishati na Madini, Profesa Sospeter Muhongo ameeleza kuwa Serikali itaunda Kamati itakayotathmini kero zinazolalamikiwa na wananchi wanaozunguka mgodi wa dhahabu wa Acacia North Mara uliopo wilayani Tarime Mkoa wa Mara, na majina ya Kamati hiyo yatawasilishwa kwake leo.

Alitoa maamuzi hayo akiwa katika ziara yake ya kikazi wilayani hapa iliyolenga kutatua kero za wananchi hao, kabla ya kutoa msimamo huo wa Serikali, alizungumza na makundi mbalimbali ikiwemo wananchi, viongozi wa wananchi wakiongozwa na Mbunge wa Tarime Vijijini, John Heche na Kamati ya Ulinzi na Usalama ya Wilaya hiyo.

“Baada ya kusikiliza wananchi ambao walieleza kero zao na baadaye kukutana na mgodi na kuwaeleza malalamiko ya wananchi ambayo mengine wameyakubali na mengine kuyakataa, sasa ili kutatua suala hili kwanza lazima tuunde Kamati itakayoangalia kwa undani sehemu zinazolalamikiwa na kupata vielelezo kabla ya kufanya maamuzi yoyote,” alisema.

Alisema Kamati hiyo itaundwa na wajumbe kutoka Wizara hiyo katika Idara ya Madini, Ofisi ya Mkuu wa Wilaya Tarime, Mwakilishi wa Mbunge wa Tarime Vijijini, viongozi wa vijiji na vitongoji vinavyozunguka mgodi huo, Kamati ya Ulinzi na Usalama ya Wilaya na Baraza la Taifa la Usimamizi na Uhifadhi wa Mazingira (NEMC).

Kamati hiyo pia itajumuisha Ofisa wa Maji na Mtathmini kutoka Halmashauri ya Tarime, Wizara ya Ardhi, Ofisi ya Rais, Tawala za Mikoa na Serikali za Mitaa (Tamisemi), wawakilishi wa mgodi wa Acacia North Mara.

CHANZO: HABARI LEO