NYERERE CUP KURINDIMA MUSOMA MJINI

na Sitta Tumma

KATIKA kukuza na kuboresha sekta ya michezo hapa nchini, Mbunge wa Musoma Mjini, mkoani Mara, Vincent Nyerere (CHADEMA), amegawa vifaa mbalimbali kwa kata 13 za jimbo hilo ikiwa ni maandalizi ya kuanzisha ligi itakayojulikana kama Nyerere Cup.

Lengo la michuano hiyo ni kuwajengea uwezo vijana katika masuala ya kimichezo, kuibua na kukuza vipaji vya vijana wa Musoma, ili baadaye waweze kuwa wachezaji wazuri ndani na nje ya nchi.

Akizungumza katika mkutano wa hadhara uliofanyika mwishoni mwa wiki kwenye viwanja vya Nyakato, Shule ya Msingi mjini hapa, Nyerere alisema tayari vifaa hivyo vikiwamo jezi na mipira alishavitoa kwa kuwakabidhi maofisa watendaji wa kata zote 13 za jimbo la Musoma mjini na kwamba viongozi hao wanatakiwa waandae utaratibu mzuri wa kuwashirikisha vijana katika uundaji wa timu.

“Suala la michezo kwa vijana wetu ni jambo zuri sana. Kwa hiyo nimeshaleta na kuwakabidhi maofisa watendaji jimbo lote mipira na jezi kwa ajili ya kuanzisha ligi ya jimbo.

“Nasikia baadhi ya watendaji wameficha na hawataki kuwaelezeni kuhusu vifaa hivyo vya michezo nilivyokabidhi. Sasa kupitia mkutano huu natoa onyo kwa mtendaji yeyote ambaye amefungia vifaa hivi, ahakikishe anavigawa kwa vijana. Sijaleta kwa ajili yao, nimeleta kwa ajili ya vijana wetu tuanzishe ligi ya jimbo,” alisema mbunge huyo.

Alisema kamwe hatashindwa wala kumuonea aibu ofisa mtendaji yeyote wa kata atakayehujumu vifaa hivyo vya michezo alivyovitoa na kuwahakikishia wananchi wa jimbo hilo, wakiwemo wapenda soka kwamba ataendelea kuwekeza pia kwenye michezo ili kuinua sekta hiyo muhimu.

“Musoma mjini kamwe sitakomea kuanzisha michuano ya soka jimboni hapa, bali nitahakikisha na michezo mingine naifadhili ili kutoa fursa kwa vijana wengine wanaopenda michezo mbalimbali kushiriki na hatimaye kuwa wachezaji wazuri wa kitaifa na kimataifa, kisha kuliletea sifa jimbo, mkoa na taifa kwa ujumla,” alisema.

Chanzo: Tanzania Daima