Bunda kuwaburuta mahakamani Wachina

Bunda. Halmashauri ya Wilaya ya Bunda, mkoani Mara, inakusudia kuwashtaki mahakamani, Wachina wanaokarabati kwa kiwango cha lami, Barabara ya Musoma - Simiyu kutokana na kitendo chao cha kuchimba madini ndani ya eneo la halmashauri hiyo bila kulipa fidia.

Mkurugenzi Mtendaji wa halmashauri hiyo, Simon Mayeye, alisema Wachinahao kupitia kampuni yao ya ujenzi, walivamia Vitongoji vya Balili Chini na Bigutu vya wilayani humo na kuanza kuchimba madini bila idhini ya mamlaka husika.

Alisema “kwa mujibu wa sheria, kila mkandarasi anayetaka kuchimba madini anapobaini mahala yalipo, lazima awasilishe mikakati aliyo nayo kuhusu kuwalipa fidia waathirika na kwamba hatua hiyo inapaswa kufanyika kabla hajaanza kuyachimba.”

Mkurugenzi huyo alisema hata hivyo Wachina hao hawakufanya hivyo.

Mayeye alisema tayari halmashauri yake imeshawaandikia Wachina hao kuwataarifu juu ya nia ya kuwafikisha mahakamani kwa kosa hilo.

Mwanasheria wa halmashauri hiyo, Phillip Shoni alisema suala la ulipaji wa fidia kwa madini ya ujenzi ambayo ni chokaa, mawe na mchanga, limeainishwa katika sheria namba 14 ya madini inayotakiwa kuheshimiwa na wadau wote wa ujenzi .

Shoni alisema hata hivyo Wachina hao kwa upande wao, wameshindwa kutekeleza matakwa ya sheria hiyo.
Chanzo;Mwananchi