SIDO yawanufaisha wajasiriamali Kanda ya Ziwa

WAJASIRIAMALI walioshiriki maonesho ya  bidhaa katika Kanda ya Ziwa wamelipongeza Shirika la Viwanda Vidogo Vidogo (SIDO) makao makuu kwa kuandaa maonyesho hayo ambayo yamewasaidia katika kutangaza bidhaa zao sehemu mbalimbali ndani na nje ya nchi.

Wakizungumza na gazeti hili kwa nyakati tofauti katika siku ya kilele cha maonesho hayo yaliyofanyika katika viwanja vya Shule ya Msingi Mkendo, Manispaa ya Musoma, Mkoa wa Mara, wamesema kuwa kumekuwepo na mabadiliko ya mauzo katika siku hizo nne  za maonesho hayo kuanzia Novemba 29 hadi Desemba 2, mwaka huu  tofauti na siku nyingine.

Wakitoa shukurani kwa uongozi wa Mkoa wa Mara na viongozi wote wa Kanda ya Ziwa na makao makuu kwa kufanikisha zoezi hilo, wajasiriamali hao walisema kuwa  SIDO imekuwa ikiwakutanisha kwa pamoja wajasiriamali wakubwa na wadogo hali inayowasaidia katika kubadilishana uzoefu wa kazi na kuongeza ujuzi zaidi na kikubwa zaidi ni kuwasaidia wajasiriamali wadogo kukua na kutangaza bidhaa zao.

“Hapa tunakutana na wajasiriamali mbalimbali kutoka ndani na nje ya nchi. Mfano hawa wajasiriamali kutoka Nairobi, Kenya wanatupa hamasa sisi Watanzania zaidi katika kuongeza juhudi ya kuzalisha kwa kuwa tayari tunajua kuwa hata sisi bidhaa zetu tutaenda kuuza nje ya nchi, hasa tunapokuwa tunashiriki maonesho kama haya ambayo huko Kenya wao wanayaita JUA KALI,” alisema mmoja wa washirki kutoka Kagera.

Mbali na maonesho ya bidhaa mbalimbali zilizooneshwa katika maonesho hayo, zaidi kilichowavutia watu wengi ni kichwa cha mtu kilichokuwa kikiongea ambapo kukiona ilikuwa inakugharimu kulipia shilingi 1,000 kama unataka kuzungumza nacho na shilingi 500 kukiona tu bila kufanya mazungumzo nacho.

“Kwa ujumla maonesho yalikuwa mazuri, tumeuza sana kiasi ambacho hatukutarajia kabisa kulingana na sifa ya Mkoa wa Mara tunavyoisikia kutokana na taarifa mbalimbali, lakini kumbe Mara ni mkoa mzuri sana, watu wanafanya kazi kweli, tumejionea wenyewe,” alisema FANA Soap muuzaji wa sabuni za Kigoma.

 Nae Meneja wa SIDO Mkoa wa Mara, Frida Mungulu  aliipongeza timu ya SIDO Mara na SIDO Kanda ya Ziwa kwa kushiriki kikamilifu tangu siku ya maonesho hadi kilele  na kuwaomba waendelee na ushirkiano huohuo.

Akifunga maonesho hayo kwa niaba ya Mkuu wa Mkoa wa Mara, John Gabriel Tuppa, Mkuu wa Wilaya ya Musoma, Jackson  Msome alisema kuwa uzoefu huo waliobadilishana katika  maonesho hayo waendelee kuutumia ili kuleta ufanisi katika bidhaa zao na wawe tayari kutumia fursa zinazopatikana bila kurudi nyuma.

Chanzo;Tanzaia Daima