TANAPA yatoa mabati 6000 ya miradi vijijini

SHIRIKA la umma la Hifadhi ya Taifa Tanzania (TANAPA), limetoa mabati  6000, kwa ajili ya kusaidia miradi mbalimbali ya maendeleo katika vijiji vinavyozunguka hifadhi za taifa.

Kauli hiyo ilitolewa jana na Kaimu Mkurugenzi wa TANAPA, William Mwakilemo, wakati akizungumza kwenye semina ya mafunzo ya siku sita kwa wanahabari kuhusiana na ujirani mwema.

Mwakilemo ambaye pia ni Mhifadhi Mkuu wa TANAPA, alisema msaada huo wa mabati umelenga kuchochea upatikanaji wa maendeleo ya jamii ya vijijini.

Katika semina hiyo ya mafunzo iliyowashirikisha pia viongozi wa vijiji na kimila, alisema msaada huo ulisaidia ujenzi wa shule, zahanati, vituo mbalimbali vya polisi na miradi mingine iliyolengwa kwa mujibu wa mahitaji halisi.

“Katika utekelezaji wa sera za ujirani mwema, TANAPA tumeweza kutoa msaada wa mabati 600 kwa vijiji vinavyozunguka hifadhi za taifa. Mabati haya yamesaidia ujenzi wa vituo vya polisi, shule na miradi mingine kulingana na mahitaji,” alisema  Mwakilemo.

Akizungumzia ujangili, alisema haupaswi kufumbiwa macho na kusema jamii ina wajibu wa kutoa taarifa dhidi ya watu wanaojihusisha nao.

Alisema majangili wamo ndani ya jamii hivyo wananchi lazima washiriki kupambana na kutoa taarifa kwa vyombo vya dola ili  wakamatwe.

Aliiomba jamii kuheshimu sheria za nchi kwa kutoingia ndani ya hifadhi za taifa kwa ajili ya malisho ya mifugo au kufanya shughuli zozote bila kibali cha serikali.

Baadhi ya washiriki wa semina hiyo, walilalamikia kitendo cha askari wa TANAPA kuipiga risasi mifugo na kuiua pindi inapoingia kwenye hifadhi kwa bahati mbaya.

Chanzo;Tanzania Daima