Wananchi wafichua uongo wa mawaziri

WANANCHI wa vijiji vya kuzunguka Hifadhi ya Mbuga ya Taifa ya Serengeti (SENAPA) wamefichua udanganyifu waliodai kufanyiwa na baadhi ya mawaziri wakati wa kampeni za uchaguzi mkuu mwaka 2010 kuwa watamiliki bonde la Nyanungu kwa kumchagua mbunge wa sasa wa Tarime.

Waliwataja mawaziri hao kuwa ni Stephen Wasira (Waziri wa Nchi Ofisi ya Rais – Mahusiano na Uratibu), Gaudensia Kabaka (Waziri wa Kazi na Ajira)  na mbunge wa sasa wa Tarime, Nyambari Nyangwine.

Wananchi hao walibainisha hayo wakati Kamati ya Kudumu ya Bunge ya Ardhi, Maliasili na Mazingira inayoongozwa na Mwenyekiti James Lembeli ilipowatembelea maeneo hayo na kukutana na wahanga wa Operesheni Tokomeza Ujangili katika Kijiji cha Kegonga.

Mmoja wa wananchi hao, Kimunye Chacha alisema viongozi hao waliwadanganya kuwa endapo wangempigia kura Nyangwine wangerudishiwa Bonde la Nyanungu kuwasaidia katika matumizi ya kilimo na ufugaji.

“Ndugu mwenyekiti tunatambua bonde la Nyanungu ni letu kwani mawaziri Stephen Wasira, Gaudensia Kabaka na mbunge wetu walituhakikishia kuwa eneo hilo ni letu na tunashangaa tunaambiwa kuwa ni la TANAPA,” alisema Chacha.

Makamu mwenyekiti wa kamati hiyo, Abdulkarim  Shah aliyemuwakilisha mwenyekiti wake,  aliwaambia wananchi hao kuwa kamati yake itawasilisha changamoto walizopatiwa kutoka kwa wananchi hao zilizosababishwa na Operesheni Tokomeza Ujangili.

Shah aliwatahadharisha kuwa makini na wale wanaohitaji uongozi wakati wa kampeni, kwani wengi wao wanawadanganya wananchi kwa kujitafutia kura kwa nafasi wanazozihitaji huku akisema kuwa viongozi hao waliohusika kuwadanganya hawana budi kuulizwa kwa kile ambacho kinadaiwa kuchangia kuchochea mgogoro.

Wakati kamati hiyo ikikumbana na changamoto hiyo, Mhifafhi Mkuu wa Mbuga ya Taifa ya Serengeti (SENAPA), William Mwakilema  alisema bonde hilo ni mali ya TANAPA tangu mwaka 1968 baada ya kupitishwa sheria ya upanuzi wa mipaka na kuwekwa vipimo vyake iliposainiwa na Rais wa kwanza wa Tanzania, Baba wa Taifa hayati Juluis Nyerere.

Mwakilema alisema mbuga hiyo ilianza mwaka 1951 na baadae ilipandishwa hadhi mwaka 1959 ambapo mwaka 1968 ilipanua mipaka yake kutokana na kujali zaidi mapito ya wanyama hao huku akisisitiza kuwa wao wanasimamia sheria hiyo na hapaswi mwananchi yeyote yule kuungilia mipaka hiyo.

Chanzo;Tanzania Daima