Wananchi wafurahishwa waziri kuwatembelea na kusikiliza kero zao

WANANCHI wa kijiji cha Majimoto, katika wilaya ya Serengeti, mkoani Mara, wamefurahishwa na kitendo cha waziri wa nishati na madini Sospeter Muhongo kwa kuwatembelea na kusikiliza kero zao mbalimbali zinazowakabili.

Wakiongozwa na mwenyekiti wa kijiji hicho Bw. Johannet Masirori, wananchi hao wameiambia Radio Free Africa, kuwa wiki iliyokwisha waziri huyo aliwatembelea, kwa ajili ya kusikiliza kero zao mbalimbali ili ziweze kupatiwa ufumbuzi.

Wamezitaja kero hizo kuwa ni pamoja na kero wanayodai walinyang’anywa ardhi yao na kampuni moja ya Bismark iliyoingia katika eneo hilo kwa ajili ya utafiti wa madini aina ya dhahabu.

Bw. Masirori amesema kuwa baadaye kampuni hiyo mwaka 2006 ilianza uchimbaji wa dhahabu katika eneo hilo bila kupewa na serikali ya kijiji na kwamba sasa imeweka uzio na kutaka kuwahamisha wananchi kwa nguvu walioko katika eneo hilo.

Amesema kuwa mgogoro huo ni mkubwa na ni wa siku nyingi, kwani wananchi wamegoma kwa sababu hawawezi kuhamishwa bila ya kupewa fidia.

Ameongeza kuwa baada ya waziri kuwatembelea na kusikia kero hiyo, alimwagiza kamishina wa kanda ya ziwa kushughulikia malalamiko hayo, ikiwa ni pamoja na wananchi kulipwa fidia.

Wananchi hao wamesema kuwa kitendo cha waziri Mhongo kuwatembelea na kusikiliza kero zao, ikiwemo na ya kuukosa umeme ni faraja kubwa sana kwamba serikali inasikiliza kilio cha wananchi wake.

Hata hivyo kampuni hiyo imekuwa ikidai kuwa eneo hilo walilipata baada ya kupewa vibali na serikali tangu mwaka 1991.