Baraza la mamlaka ya mji mdogo la mkataa mkaguzi wa barabara

BARAZA la mamlaka ya mji mdogo wa Bunda, mkoani Mara, jana limemkataa mkaguzi wa barabara wa halmashauri ya wilaya hiyo, kwa madai kuwa hawajibiki ipasavyo katika kufungua na kulima barabara katika mji huo.

Mkaguzi wa barabara wa wilaya hiyo, Bw. Martin Jahulula, amekataliwa na baraza la mamlaka ya mji mdogo wa Bunda, jana kwenye kikao cha kupitisha bajeji ya mwaka wa fedha wa 2014/2015 kilichofanyika mji Bunda.

Wakichangia katika kikao hicho wenyeviti wa vitongoji katika mamlaka ya mji mdogo wa Bunda, wamesema kuwa Jahulula amekuwa hawajibiki ipasavyo katika kutekeleza majukumu yake, hali ambayo inasababisha mji huo huoa kutokuwa na barabara zenye ubora.

Wamesema kuwa amekuwa akijipangia yeye mwenyewe barabara anazotaka kulima bila kushirikisha maamuzi ya vikao wala wenyeviti wa vitongoji husika na kwamba pia amekuwa akifanya hivyo katika mazingira ya kuomba rushwa.

Hata hivyo hawakufafanua kuwa ni rushwa ya kiasi gani na kutoka wapi ambayo amekuwa akiiomba au kuichukuwa katika mazingira hayo.

Aidha wamesema kuwa kutokana na barabara za mji huo kutokulimwa na kuwa na ubora unaotakiwa, hali hiyo itasababisha mji huo kutokupandishwa na kuwa mji kamili, kwa sababu kigezo mojawapo ni kuwa na barabara zenye ubora.

Kufuatia hali hiyo wenyeviti hao walimtaka mkurugenzi mtendaji wa halmashauri hiyo Bw. Simoni Mayeye, kumuondoa kwenye nafasi hiyo mtalaamu huyo na kumtafutia kazi nyingine na kuongeza kuwa hawako tayari kufanya naye kazi.