Halmashauri yashindwa kusomesha watoto walio kwenye mazingira hatarishi

WAJUMBE wa baraza la mamlaka ya mji mdogo wa Bunda, mkoani Mara, wamelalamikia kitendo cha halmashaurui ya wilaya hiyo, kushindwa  kulipia karo ya wanafunzi wanaoishi katika mazingira magumu zaidi ya 70 kila mwaka na kusababisha wanafunzi hao kunyimwa vyeti vya kumaliza kidato cha nne.

Wajumbe hao ambao ni wenyeviti wa vitongoji katika mji huo, wamelalamikia kitendo hicho jana kwenye kikao cha bajeti ya mwaka wa fedha 2014/2015, kilichofanyika mjini Bunda.

Wakiongozwa na mwenyekiti wa mamlaka ya mji mdogo wa Bunda, Bw. Pastory Ncheye, wamesema kuwa mwaka wa fedha wa 2011/2012 na mwaka wa fedha wa 2012/2013, walipitisha bajeti kwamba watoto zaidi ya 70 hadi 80, wanaosoma sekondari wawe wanalipiwa karo na mamlaka hiyo, ambapo kila mtoto alipaswa kulipiwa sh. 20,000 kwa mwaka.

Wamesema kuwa pamoja na kupitisha bajeti hiyo watoto hao hawajawahi kulipiwa karo hiyo na kusababisha kunyimwa vyeti baada ya kumaliza kidato cha nne.

Wameongeza kuwa kwenye makaburasha ya mamlaka hiyo fedha za kulipia wanafunzi hao zimekuwa zikitengwa, lakini cha ajabu katika shule wanazosoma watoto hao, ikiwemo ya Dk. Nchimbi, karo hiyo haijawahi kulipwa kwa vipindi vyote hivyo.

Kufuatia hali hiyo wamemtaka mkurugenzi mtendaji wa halmashauri hiyo, Bw. Simoni Mayeye, kushughulikia kero hiyo ili wanafunzi hao waweze kulipiwa karo yao.

Mkurugenzi huyo ameahidi kulishughulikia suala hilo, kwa ajili ya kuondoa kero hiyo.

Mamla ya mji mdogo wa Bunda imepitisha bajeti ya mwaka wa fedha wa 2014/2015, ambapo imekadiria kukusanya na kutumia kiasi cha shilingi 423,955,200, makadirio ambayo ni chini ikilinganishwa na mwaka wa fedha wa 2013/2014 kwani walikuwa wamekadiria kukushanya jumla ya sh. 595,080,000.