Mwibara wasema miradi mingi inatekelezwa Bunda

UMEZUKA mvutano mkubwa katika baraza la madiwani wa halmashauri ya wilaya ya Bunda, mkoani Mara, kuhusu mgawanyo wa fedha za miradi ya maendeleo, ambapo madiwani wa jimbo la Mwibara wamelalamika kwamba jimbo la Bunda linatengewa fedha nyingi na Mwibara kupewa kidogo.

Mvutano huo umetokea jana kwenye kikao cha bajeti ya mwaka wa fedha wa 2014/2015 cha baraza hilo kilichofanyika katika ukumbi wa halmashauri mjini Bunda, ambapo nusura bajeti hiyo  isipitishwe.

Katika kikao hicho kilichokuwa chini ya mweyekiti wake Joseph Malimbe, baadhi ya madiwani wa kata za jimbo la Mwibara walikataa kuipitisha bajeti hiyo kwa madai kuwa kuna upendeleo wa fedha za ruzuku ya serikali na mfuko wa barabara.

Madiwani hao wamesema kuwa hawako tayari kupitisha bajeti hiyo kwani fedha nyingi zimeelekezwa katika jimbo la Bunda,kwa ajili ya kutekeleza miradi ya maendeleo.

Diwani wa kata ya Kisorya (CCM) Misana Jigwila na diwani wa kata ya Nansimo (CCM) Sabatho Mafwimbo, waliwaongoza wenzao katika kulalamikia hali hiyo, huku madiwani wa kata za jimbo la Bunda wakiwabeza kwamba bajeti hiyo imeshapitishwa na vikao vya kamati.

Mvutano huo ulimfanya mbunge wa Mwibara Kangi Lugola, kuingilia kati na kusema kuwa niwajibu wa madiwani kuchangia bajeti hiyo kwani baraza hilo ndilo linaloipitisha na sio vikao vya kamati za kudumu.

Hata hivyo kutokana na mvutano huo, zilipigwa kura na waliosema ipitishwe wakashinda na ndipo bajeti hiyo ikapitishwa, ambapo sh. bilioni 1.7 za ruzuku ya serikali zimetengewa katika kata za jimbo la Bunda, huku Mwibara ikiambulia sh milioni 579 tu.

Aidha mfuko wa barabara zimetengewa kilomita 151.5 zenye thamani ya zaidi ya sh. bilioni 1.5 katika jimbo la Bunda, lakini Mwibara ni kilomita 72 tu zenye thamani ya zaidi ya sh. milioni 956.