Washtakiwa watano jela miaka 90

Mahakama ya Wilaya ya Musoma, mkoani Mara, imewahukumu watu watano kati ya saba kifungo cha miaka 90 kila mmoja baada ya kukutwa na hatia katika makosa matatu.

Kati ya makosa hayo, mawili ya ubakaji na moja la unyang'anyi wa kutumia silaha ambapo washtakiwa wawili, waliachiwa huru baaada ya mahakama kushindwa kuwatia hatiani.

Hukumu hiyo imetolewa Desemba 30,2013 ambapo Hakimu Mwandamizi wa Mahakama hiyo, Bw. Richard Maganga, aliwataja washtakiwa waliotiwa hatiani kuwa ni Juma Patick (25), Mirumbe Mwita (28), pamoja na Babu Zacharia (20).

Wengine ni Sokolo Songoye (21), Deus Butiku (20) ambapo Mirunde Johanes (28) na Msai Elius Mwita (20) wakiachiwa huru ambapo washtakiwa wote ni wakulima na wakazi wa
Manispaa ya Musoma, mkoani humo.

"Hawa washtakiwa walifanya makosa hayo usiku wa Mei 4,2013, katika eneo la Bweri, Manispaa ya Musoma, kila kosa wamepewa adhabu ya kukaa gerezani miaka 30.

Alisema washtakiwa hao walimbaka msichana mwenye umri wa miaka 33 (jina tunalo), kila mmoja kwa nyakati tofauti na baada ya kufanya unyama huo walimbaka msichana wake wa kazi
mwenye umri wa miaka 20 (jina tunalo) kwa zamu.

"Daktari alithibitisha kuwa wasichana hawa walibakwa baada ya kuwapima na kukuta mbegu za wanaume zaidi ya mmoja lakini hawakukutwa na maambukizi yoyote," alisema.

Katika utetezi wao, washtakiwa hao walikana kuhusika na tukio hilo lakini baada ya Mahakama kusikiliza hoja za pande zote hasa ushahidi wa upande wa mashtaka, irijiridhisha kuwa washtakiwa walihusika na tukio hilo na kutoa adhabu hiyo.

Pamoja na adhabu hiyo, Mahakama hiyo pia imewaamuru washtakiwa hao wamlipe fidia msichana waliyembaka awali mwenye miaka 33 sh. milioni mbili kutokana na upotevu wa vitu vyake na ubakaji walioufanya kama fidia.

Vitu vinavyodaiwa kuibwa na washtakiwa ni fedha taslimu sh.100,000, televisheni moja aina ya Panasonic yenye thamani ya sh. 20,000 na radio aina ya Panasonic (180,000).

Vingine ni DVD moja aina ya Samsang (85,000), saa ya mkononi (22000) na simu tatu za mkononi (240,000).

Mwendesha mashitaka aliyefahamika kwa jina moja la Stephano,alisema upande wa mashtaka ulikuwa na mashahidi sita akiwemo mlalamikaji pamoja na daktari aliyemchukua vipimo

Chanzo;Majira