CCM yamwomba radhi mwandishi

CHAMA Cha Mapinduzi (CCM) mkoani Mara kimeomba radhi kwa Chama cha Waandishi wa Habari mkoani Mara (MRPC) kutokana na kitendo kinachodaiwa kufanywa na wafuasi wa chama hicho, kwa kumpiga mwandishi wa habari wa gazeti la Mwananchi,  Christopher Maregesi, na kuahidi waliohusika watachukuliwa hatua.

Mwenyekiti wa CCM mkoani Mara, Christopher Sanya, alisema chama hicho kinamuomba radhi mwandishi huyo pamoja na waandishi wote mkoani Mara.

Sanya alisema chama hicho kitafanya uchunguzi na kuwachukulia hatua wale wote watakaobainika kumshambulia mwandishi huyo wakati akitekeleza wajibu wake.

Alisema chama hicho kinathamini na kutambua mchango wa mwandishi huyo na waandishi wote kwa ujumla, hivyo kitendo kilichofanywa na watu wanaodaiwa kuwa ni wafuasi wao si cha kiungwana.

“Mimi nikiwa mwenyekiti wa CCM Mkoa wa Mara, kwa niaba ya chama ninaomba radhi kwa kitendo alichofanyiwa mwandishi huyo wa habari na watu wanaodaiwa kuwa ni makada wa chama, ninakemea, kwani si cha kiungwana…tutafanya uchunguzi na wale watakaobainika watachukuliwa hatua,” alisema.

Maregesi alishambuliwa na kupigwa  Februari 8 mwaka huu na watu wanaodaiwa kuwa ni wafuasi wa CCM katika eneo la chama hicho mjini Bunda, muda mfupi baada ya mkutano wa kampeni wa kumnadi mgombea udiwani katika Kata ya Nyasura, Alexander Mwikwabe kumalizika.

Chanzo;Tanzania Daima

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.