DIWANI TARIME ATAKA ENEO LA MAZIKO

DIWANI wa Nyamisangura, Thobias Ghati (CHADEMA), ameitaka Halmashauri ya Mji wa Tarime, mkoani Mara kutatua kero ya ukosefu wa eneo la kuzikia na kusababisha maiti zaidi ya moja kuzikwa katika kaburi moja.

Ghati aliibua hoja hiyo katika kikao cha kawaida cha Baraza la Madiwani kilichomalizika wiki iliyopita mjini hapa. Hoja hiyo iliungwa mkono na madiwani wanzake.

Alisema alishuhudia wananchi wakichimba kaburi katika maeneo ya maziko, eneo la Ronsoti na kukuta wamezikwa watu wawili.

Alisema waombelezaji hao walibaini watu wawili walizikwa kaburi moja baada ya kukuta mafuvu ya vichwa viwili vilivyokuwa katika eneo walilochimba kaburi kwa ajili ya kumzika mtumishi mmoja wa halmashauri ya mjini wa Tarime.

Ghati aliitaka halmashauri yake isaidie kupatikana eneo jingine kwa ajili ya maziko kutokana na eneo la Ronsoti kujaa.

Mkurugenzi wa halmashauri hiyo, Venance Mwamengo, alisema tayari kumepatikana eneo jingine.

Mwamengo alisema walifanikiwa kupata eneo la ardhi ya mkazi mmoja wa mjini hapa lenye ukubwa wa ekari 30 anayehitaji kulipwa fidia ya sh milioni 39.

Chanzo;Tanzania Daima

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.