Mabwawa ya SENAPA yakauka

WAFUGAJI wa mifugo wa vijiji vya Mangucha, Kegonga, Masanga na Gibaso, kata za Nyarukoba, Gorong’a na Nyanungu wamelazimika kuingiza mifugo yao katika Bonde la Nyanungu lililomo ndani ya Hifadhi ya Mbuga ya Taifa ya Serengeti kinyume cha sheria baada ya mabwawa waliyochimbiwa na SENAPA kukosa maji.

Wakielezea adha hiyo, madiwani Mustapha Masian (Nyarukoba), Magarya Wambura (Gorong’a) na Mang’enyi Ryoba (Nyanungu), walisema ukosefu wa maji kutokana na kukauka kwa mabwawa hayo, umesababisha kuuawa kwa mifugo kwa kupigwa risasi na askari wa wanyama pori kutokana na wafugaji kulazimika kuingiza mifugo yao katika hifadhi hiyo.

Madiwani hao walisema ukosefu huo wa maji umesababisha pia kukamatwa na kufikishwa mahakamani kwa baadhi ya wafugaji na kupigwa faini baada ya kukutwa wakichunga katika bonde hilo.

“SENAPA walichimba mabwawa ya kunyweshea mifugo mwaka 2006/2007 katika vijiji vya Mangucha na Masanga ambayo tangu mwaka huo hayajatoa maji kutokana na kuchimbwa vibaya, na kwamba SENAPA hawakuweza kurudi tena kufanya marekebisho hayo ili yaweze kutoa maji kuondoa kero ya maji ya mifugo kuingia hifadhini,” alisema mmoja wa madiwani hao.

Walisema wananchi wameshindwa kuendeleza miradi mingine ya shule baada ya kuendeshwa ujenzi wake wa vyumba vya madarasa vinne vya kila shule za msingi za Kegonga na Mangucha mwaka 2001/2002 na SENAPA kutokana na vijiji hivyo ardhi zake kuingia katika hifadhi hiyo.

Watendaji wa kata hizo, Gorong’a (Hezron Makaranga), Nyanungu (Deodatus Waikama) na Nyarukoba (Lucas Kichogo), waliliambia gazeti hili kuwa walitekeleza maazimio ya vikao vyao vya kata vya kamati za maendeleo za kata (WDC) vilivyoketi kwa kuwaandikia barua SENAPA kutekeleza maazimio ya kukutana kila baada ya miezi mitatu.

Hata hivyo, watendaji hao wamesema uongozi wa SENAPA ulishindwa kuitikia vikao hivyo ikiwa ni njia ya kuweka mahusiano baina yao na wananchi kujadili na kuamua utekelezaji wake.

“Kwa mujibu wa rejea ya vikao vyetu ya ujirani mwema, na kile kilichohudhuriwa na Mkuu wa Mkoa wa Mara, John Tuppa, cha Julai 22, 2013 tulichoketi Kijiji cha Kegonga kuwa tuwe tunakutana mara baada ya miezi mitatu ama dharura, SENAPA hawajatekeleza hilo,” alisema mtendaji wa Kata ya Nyanungu, Waikama.

Waikama alisema kuwa wamechukua hatua ya kumjulisha Mkuu wa Wilaya, John Henjewele na Mkuu wa Mkoa wa Mara, Tuppa, ambao walimtaka muhifadhi mkuu wa SENAPA, William Mwakilema kutekeleza maazimio ya vikao vya kata hizo.

Ukosefu wa malisho kwa wafugaji wa mifugo katika vijiji hivyo na malambo ya kunyweshea mifugo yao kushindwa kutatuliwa na SENAPA kumeibua matukio ya ukiukaji wa sheria na kuzua uhasama mkubwa baina ya askari wa wanyama pori na wananchi wa vijiji hivyo, hasa baada ya kushindwa kutatuliwa changamoto zilizopo kwa njia ya vikao vya pamoja.

Chanzo;Tanzania Daima