Tarime hakukaliki, msako kila kona

WAKATI watu kumi wanashikiliwa na polisi kwa tuhuma za kuhusika na matukio mfululizo ya mauaji wilayani Tarime, mkoani Mara, wakazi wa mji huo wanaishi kwa mashaka na kushindwa kufanya shughuli zao za kila siku.

Mji wa Tarime hivi sasa haukaliki kutokana na msako mkali unaoendeshwa na Jeshi la Polisi kila kona kwa lengo la kuwasaka watu waliohusika na mauaji ya kinyama yaliyoutikisa mji huo kwa takribani wiki tatu sasa.

Matukio hayo ya mauaji yamekuwa yakijirudia mara kwa mara na kusababisha hofu kubwa miongoni mwa wakazi hao hadi kufikia hatua ya kushindwa hata kufanya kazi zao za kila siku.

Katika kipindi cha siku tatu mfululizo, kundi la mauaji hayo ambalo linadaiwa halizidi watu watano, limewaua kinyama watu wanane wasio na hatia.

Wakizungumza kwa Nyakati tofauti na gazeti hili jana, baadhi ya wananchi waliopoteza ndugu zao walisema kuna jambazi mmoja anayehusika kupanga mauaji hayo.

Kamanda wa Polisi Kanda Maalumu ya Tarime na Rorya, Justus Kamgisha, aliliambia gazeti hili kuwa hadi sasa watu kumi wanashikiliwa na polisi kwa tuhuma za kuhusika na mauaji hayo.

Kamanda Kamgisha aliwataja waliouawa kuanzia Januari 27 hadi sasa kuwa ni Marwa Nyitara, (30), Nkende Davidi, Matiko Yomami, Machungu Nyamaheba, Sammy Magori, Marwa Nyaitara, Ericki Lucas, Chacha Magege na mwingine aliyemtaja kwa jina moja la Mwasi.

Kwa mujibu wa Kamanda Kamgisha, uchunguzi wa awali umeonyesha kuwa muuaji huyo ambaye hajafahamika wala kukamatwa, ndiye kinara wa mipango ya mauaji hayo na amekuwa akitumia silaha ambayo hadi leo haijafahamika kwamba ni aina gani.

Ili kuongeza nguvu katika kuwasaka wauaji hao, alisema kuwa Mkuu wa Jeshi la Polisi nchini (IGP), Ernest Mangu ametuma timu maalumu kutoka Makao Makuu ya Jeshi la Polisi nchini kuwasaka maharamia hao katika maeneo ya Kenyamanyori, Rebu, Nkende, Mogabile, Kibumaye, Kitare na Turwa, yote ya Tarafa ya Inchage.

Chanzo;Tanzania Daima