Walia kubomolewa vibanda usiku

WAFANYABIASHARA wa eneo la Sabasaba katika mji wa Tarime, mkoani Mara, wamelalamikia kitendo cha kikatili kilichofanywa na mkurugenzi wa halmashauri ya mji huo cha kubomoa vibanda vyao  usiku bila kuwataarifu.

Wakizungumza kwa nyakati tofauti na Tanzania Daima jana, baadhi ya wafanyabiashara hao walieleza kusikitishwa na zoezi hilo kuendeshwa saa 8 usiku, hivyo kukosa nafasi ya kutoa mali zao.

Mmoja wa wafanyabiashara hao, Maluki Mdoye, aliyekuwa akifanya biashara ya mgahawa, alieleza kushtushwa na kitendo hicho kwani alikuta baadhi ya mali zake zikiwa nje na nyingine zenye thamani ya sh zaidi ya milioni nane zikiwa hazionekani.

Alieleza kuwa alipomuuliza mlinzi wake, alisema kwamba kundi la watu lilifika likiwa na mtu mmoja aliyejitambulisha kuwa Mkurugenzi wa Mji wa Tarime na baada ya kujitambulisha, watu hao walianza kubomoa milango na madirisha.

Mwenyekiti wa wafanyabiashara wa Wilaya ya Tarime, Charles Mbushi, alisema halmashauri haikutumia utaratibu wa kiungwana na kuita kitendo hicho ni cha kinyama na kinapaswa kulaaniwa.

Mkurugenzi wa Halmashauri ya mji huo, Venensi Mwamengo, alikiri kubomolewa kwa vibanda hivyo na kuongeza kuwa wafanyabiashara hao hawakufuata utaratibu.

Alisema waliamua kubomoa usiku kwa sababu wangebomoa mchana kugekuwa na fujo hadi inawezekana watu wangepoteza maisha na kueleza kuwa hakuna kitu chochote kilichopotea.

“Watu wa Tarime ni wababe sana, tungebomoa mchana kungetoa vurugu kubwa, lakini pia tuliwapa barua na tuliwatangazia wote, lakini waligoma kuondoka,” alisema

Chanzo;Tanzania Daima