Watu 10 mbaroni kwa tuhuma za mauaji Tarime

Kamanda wa Polisi Kanda Maalumu ya Tarime/Rorya, Kamishina Msaidizi, Justus Kamugisha.

 

Jeshi la Polisi Wilaya ya Tarime, mkoani Mara, limewakamatya watu 10 kwa tuhuma za kuhusika na mauaji ya watu nane pamoja na unyang’anyi wa kutumia silaha.
Watu hao, ambao kwa sasa wanaendelea kuhojiwa, walikamatwa kufuatia msako mkali unaofanya na askari wa jeshi hilo kwa kushirikiana na wananchi.
Kamanda wa Polisi Kanda Maalumu ya Tarime/Rorya, Kamishina Msaidizi, Justus Kamugisha, alisema watu hao walikamatwa tangu  kuanza kwa msako huo Januari 26, mwaka huu.
Alisema msako huo unaendelea na kusisitiza kuomba ushirikiano wa taarifa kutoka kwa wananchi.
“Kuanzia usiku wa Januari 25-27 alikuwa akionekana  mtuhumiwa  mmoja wa ujambazi asiyefahamika. Alikuwa akitekeleza mauaji kwa kutumia silaha aina ya SMG au SAR kutokana na maganda ya risasi yaliyopatikana maeneo ya matukio mawili.
Kwa sasa imeonekana kwamba, wahalifu wa makosa ya unyang'anyi wa kutumia silaha za moto ni zaidi ya watu watano,” alisema Kamishna Kamugisha.
Alisema watuhumiwa 10 waliokamatwa majina yao yanahifadhiwa kwa ajili ya uchunguzi ili kuwapata wanaoshirikiana katika uhalifu na kwamba, wanawahoji kabla ya kuwafikisha mahakamani.
Aliwaonya wanasiasa wanaojaribu kuingilia operesheni hiyo kwa kutaka kuwatetea wahalifu, huku Jamii ikiwataja watuhumiwa kuhusika katika vitendo vya mauaji na unyang'anyi kwa raia wasio na hatia.
Aliwataka wananchi kuendelea kutoa ushirikiano kwa kutoa taarifa kwa vyombo vya dola ili watuhumiwa wakamatwe na kufikishwa katika vyombo vya sheria.
 

CHANZO: NIPASHE