RC Mara ahimiza uadilifu

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Chanzo cha vifo vya akina mama wajawazito na watoto wachanga mkoani Mara ni utendaji kazi mbovu na kukosekana uadilifu, wauguzi kukosa wito na upungufu wa wataalamu wa afya.

Kauli hiyo ilitolewa na Mkuu wa Mkoa wa Mara, JohnTuppa wakati akifungua kikao cha kupokea taarifa ya utekelezaji wa mpango mkakati wa kupunguza vifo vya akina mama wajawazito na watoto wachanga mkoani hapa kwa kipindi cha Julai 2013 hadi Januari 2014.

Tuppa alisema amekuwa akipokea malalamiko kutoka kwa wananchi kuwa wauguzi na wataalamu wa afya wamekuwa wakichangia vifo vya akina mama na watoto wachanga, kutokana na huduma wanazopata kutowaridhisha.

Aidha mkuu huyo wa mkoa aliwataka wakuu wa wilaya kufuatilia katika vituo vya afya, zahanati na hospitali za wilaya kwa lengo la kuboresha huduma za afya na kuwataka wauguzi na wataalamu wa afya kufanya kazi za uuguzi kama wito wao unavyowataka.

“Haiwezekani vifo vya akina mama wajawazito na watoto wachanga vikaendelea kutokea kutokana na uzembe wa watu wachache kushindwa kutoa huduma za afya zinazofaa. Atakayebainika, sheria na taratibu za kinidhamu zitafuata dhidi yake,” alisema Tuppa.
Chanzo;Mwananchi