WATUMISHI WA TARIME WATAKIWA KUFUATA SHERIA.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

WATUMISHI wa Mahakama wilaya za Tarime na Rorya mkoani Mara, wametakiwa kufanya kazi kwa kuzingatia sheria na kanuni zilizopo ili kuwapa haki wananchi wanaofika katika chombo hicho.

Aidha, wametakiwa kuhakikisha wanatoa uamuzi wa mashauri yanayowafikia kwa wakati na kuhimiza askari wanaopeleleza kesi, kuharakisha upelelezi ili kuondoa malalamiko.

Hayo yalisemwa na Katibu Tawala wa wilaya Tarime, John Marwa kwa niaba ya Mkuu wa wilaya hiyo, Glorius Luoga, katika uzinduzi wa Wiki ya Sheria na Utendaji wa Mahakama nchini, iliyofanyika katika uwanja wa mpira wa Serengeti, wilayani hapa.

Marwa alisema, “pamoja na mahakama kupewa ridhaa ya kutoa haki kwa wananchi, kumekuwapo na baadhi ya watumishi wasio waadilifu ambao wanafanya kazi kwa mazoea kwa kukiuka sheria na taratibu za utumishi wa umma”. Wanafanya wananchi kukosa imani na vyombo vyao vya mahakama kutokana na watu wachache kuharibu sifa za mahakama zetu kwa tamaa zao binafsi, watumishi wa mahakama wanatakiwa kuwa waadilifu kwa kutenda haki na kujiepusha na vitendo vya rushwa kwani ni aduia wa haki,” alisema Marwa.

Hakimu Mkazi wa Wilaya, Martha Mpaze aliwaomba wananchi kuona mahakama kuwa ni chombo huru cha kutoa haki kwa wote bila kujali itikadi. Aliwataka wananchi kuzitumia mahakama kupata haki.

“Fikeni katika ofisi za mahakama kueleza matatizo yenu, ikiwemo migogoro na itasikilizwa na kutatuliwa bila kusita na kama kuna tatizo toeni taarifa kwetu wahusika ili tatizo liweze kushughulikiwa, tunatarajia kutembelea Shule za Msingi, Sekondari na Magereza kutoa elimu ya wananchi kutambua huduma zinazotolewa na mahakama na haki zao za msingi.”

Naye Hakimu Mfawidhi wa Mahakama ya Mwanzo Tarime Mjini, Denis Wenje alisema, siku ya Sheria inayoadhimishwa Februari 4 kila mwaka, inapaswa kutumiwa na wananchi kufika katika eneo la tukio kupata elimu kuhusu umuhimu wa mahakama na kujua utaratibu wa kupata haki za kisheria.

CHANZO : HABARI LEO.