Idadi ya uandikishaji wa watoto wenye ulemavu imepanda shule ya Msingi Kabarimu ‘B’ Wilayani Bunda

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 
 

Na. Lilian Lundo – MAELEZO - MARA

Idadi ya uandikishji wa watoto wenye ulemavu shule ya Msingi Kabarimu ‘B’ iliyoko kata ya Kabarimu, Halmashauri ya Mji Bunda, Mkoani Mara imepanda kutoka watoto 53 mwaka 2015 mpaka watoto 82 mwaka 2016.

Hayo yameelezwa leo, Mjini Tarime na Mratibu Elimu wa kata hiyo Josephat Wambura alipokuwa akitoa tathimini ya maendeleo ya elimu katika kata yake wakati wa semina ya waratibu elimu kata wa mkoa huo kuhusu mawasiliano na kushirikishana jitihada zenye mafanikio kwenye elimu.

“Changamoto kuu ilikuwa ni imani potofu ya wazazi, kuwa watoto wenye ulemavu hawawezi kupata elimu hali iliyopelekea uandikishaji wa shule za msingi kwa watoto wenye ulemavu kwa miaka ya nyuma kuwa hafifu ambapo kwa  mwaka 2015 watoto 53 ndio walioandikishwa huku watoto wengi wenye ulemavu wakiachwa majumbani,” alifafanua Wambura.

Aliendelea kwa kusema kuwa kupanda kwa kiwango hicho cha uandikishwaji wa watoto wenye ulemavu kumetokana na  uanzishwaji wa kamati ya Umoja wa Walimu na Wazazi (UWW)  katika shule hiyo ambapo kamati hiyo ilitembelea nyumba hadi nyumba na kutoa elimu kwa wazazi juu ya umuhimu  wa elimu kwa mtoto bila kujali ikiwa ana ulemavu au hana ulemavu.

Vile vile kamati hiyo ilianzisha kampeni ya kuhamasisha jamii kuibua watoto wenye ulemavu  waliofichwa majumbani. Kampeni hiyo ilifanikiwa na kupelekea jumla ya watoto 82 wenye ulemavu kuandikishwa shule mwaka 2016.

Aidha ofisi ya Elimu ya halmashauri hiyo iliona jitihada ambazo zimefanywa na kamati ya UWW hivyo kuiongezea shule hiyo walimu wenye ujuzi wa kufundisha watoto wenye mahitaji maalum.

Kwa upande wake Mkuu wa Kitengo cha Elimu Maalum shuleni hapo, Mwalimu John Lukiko  amesema kwamba kitendo cha kuwaficha watoto wenye  ulemavu majumbani ni moja ya changamoto kubwa iliyokuwepo katika halmashauri hiyo. Aidha aliipongeza kamati ya UWW kwa juhudi walizozifanya za kuhakikisha watoto wenye ulemavu wanapata elimu kama ambavyo mtoto asiye na ulemavu anavyopata elimu.

Kamati za Umoja wa Walimu na Wazazi (UWW) ni moja ya kitengo katika Mpango wa Kuinua Ubora wa Elimu Tanzania (Education Quality Improvement Programme-Tanzania) EQUIP-T unaosimamiwa na Serikali ya Tanzania na kudhaminiwa na Serikali ya Uingereza. Kamati hizo ziliundwa mwaka 2015 katika shule zote za msingi za Serikli katika mikoa ya Dodoma, Shinyanga, Simiyu, Tabora, Mara, Kigoma na Lindi. Lengo kuu la uanzishwaji wa kamati hizo ni kuboresha mfumo wa elimu nchini kwa kuwashirikisha wazazi na walimu.